ടെലിഗ്രാം എന്ന ആപ്പിനെക്കുറിച്ചുള്ള ചില കൗതുകമുണർത്തുന്ന കാര്യങ്ങൾ

Last Edited October 1, 2022 7:13 pm

ടെലിഗ്രാം മെസഞ്ചറിനെക്കുറിച്ച് അധികമാരും ശ്രദ്ധിക്കാത്ത ചില കൗതുകകരമായ വിവരങ്ങൾ പങ്കുവെക്കുന്നു.

ലോകത്ത് ഏറ്റവുമധികം ഉപയോക്താക്കളുള്ള ഇൻസ്റ്റൻ്റ് മെസേജിങ് ആപ്പുകളിൽ 5-ാം സ്ഥാനത്താണ് ടെലിഗ്രാം. 2020-ലെ കണക്കുകൾ പ്രകാരം ലോകമെമ്പാടുമായി 50 കോടി ഉപയോക്താക്കൾ ടെലിഗ്രാമിനുണ്ട്. ദിവസവും ഏതാണ്ട് 500,000+ ഉപയോക്താക്കൾ ആൻഡ്രോയ്ഡ് വഴിയും ~100,000 പേർ ഐ.ഓ.എസ്. വഴിയും ടെലിഗ്രാമിൽ ചേരുന്നു.
വാട്സാപ്പിൻ്റെ ഏറ്റവും വലിയ വിമർശകരിൽ ഒരാളാണ് ടെലിഗ്രാമിൻ്റെ സ്ഥാപകൻ പവേൽ ഡുറോവ്. വാട്സാപ്പ് ഇടയ്ക്ക് പണിമുടക്കുമ്പോൾ ഏറ്റവുമധികം ഗുണകരമാവുന്നത് ടെലിഗ്രാമിനാണ്. 2016-ൽ ബ്രസീലിൽ വാട്സാപ്പിന് നിരോധനം വന്നപ്പോൾ, 24 മണിക്കൂർ കൊണ്ട് 70 ലക്ഷം ഉപയോക്താക്കളെ നേടിയതായി ടെലിഗ്രാം അവകാശപ്പെട്ടു!
2019-ൽ ഫേസ്ബുക്ക് ലോകമെമ്പാടുമായി പ്രവർത്തനരഹിതമായപ്പോൾ 30 ലക്ഷം ഉപയോക്താക്കളെയും 2021-ലെ ഫേസ്ബുക്ക് ഔട്ടേജിൽ 7 കോടി ഉപയോക്താക്കളെയും ടെലിഗ്രാം ഒരു ദിവസം കൊണ്ട് നേടിയിരുന്നു.
ടെലിഗ്രാമിൻ്റെ മാതൃരാജ്യമായി കണക്കാക്കപ്പെടുന്ന റഷ്യയിൽ ടെലിഗ്രാമിന് നിരോധനമുണ്ട്.
ടെലിഗ്രാമിന് ഏറ്റവുമധികം ഉപയോക്താക്കളുള്ള രാജ്യങ്ങൾ ഉസ്ബെക്കിസ്ഥാനും എത്യോപ്യയുമാണ്. ടെലിഗ്രാമിന് നിയന്ത്രണമുള്ള ഇറാനാണ് ഏറ്റവുമധികം ഉപയോക്താക്കളുള്ള മറ്റൊരു രാജ്യം. ഉസ്ബെക്കിസ്ഥാനിൽ ഏറ്റവുമധികം ഡൗൺലോഡ് ചെയ്യപ്പെട്ട രണ്ടാമത്തെ ഐ.ഓ.എസ്. ആപ്പ് ടെലിഗ്രാമാണ്.
ടെലിഗ്രാമിന് സ്ഥിരമായ ഒരു ഓഫീസില്ല! റഷ്യയിൽ നിയന്ത്രണമുണ്ടായതിന് ശേഷം ഡുറോവ്, ടെലിഗ്രാം എഞ്ചിനീയർമാരുടെ ഒരു സംഘത്തോടൊപ്പം, വിവിധ രാജ്യങ്ങളിലൂടെ സഞ്ചരിച്ചുകൊണ്ടാണ് ജോലി ചെയ്യുന്നത്. 2018-ലെ ഒരു ട്വീറ്റ് പ്രകാരം അവർ ഇപ്പോൾ ദുബായിലാണുള്ളത്.
2019-ൽ ടെലിഗ്രാം അടിസ്ഥാനമാക്കി പ്രവർത്തിച്ചിരുന്ന 2 ലക്ഷം ഉപയോക്താക്കളുള്ള ടെലിഗ്രാസ് എന്നൊരു ആപ്പിൻ്റെ തലവനെയും സംഘത്തെയും ഇസ്രയേൽ പോലീസ് അറസ്റ്റ് ചെയ്തു. എന്തിനാണെന്നോ? അനധികൃത മയക്കുമരുന്ന് വിതരണത്തിനുള്ള ഒരു ശൃംഖലയായിരുന്നു ടെലിഗ്രാസ്!
സ്വകാര്യതയ്ക്ക് മുൻതൂക്കം കൊടുക്കുന്നതിനാൽ ഐ.എസ്.ഐ.എസ്. പോലുള്ള ഭീകരസംഘടനങ്ങൾ തങ്ങളുടെ പ്രവർത്തനങ്ങൾക്ക് ഉപയോഗിക്കുന്നത് ടെലിഗ്രാമാണ്. ചില മാദ്ധ്യമങ്ങൾ ടെലിഗ്രാമിനെ ജിഹാദി മെസേജിങ് ആപ്പ് എന്ന് വിളിക്കുവാൻ ഇതിടയാക്കി.
2014-ൽ ടെലിഗ്രാം ഗൂഢാലേഖനവിദ്യയിൽ (cryptography) അധിഷ്ഠിതമായി $200,000, $300,000 എന്നിങ്ങനെ സമ്മാനത്തുകയുള്ള രണ്ട് മത്സരങ്ങൾ നടത്തുകയും വിജയികളില്ലാതെ മത്സരങ്ങൾ അവസാനിപ്പിക്കുകയും ചെയ്തിരുന്നു. സിഗ്നൽ മെസഞ്ചറിന്റെ സ്ഥാപകനും ക്രിപ്റ്റോഗ്രാഫറുമായ മാക്സി മാർലിൻസ്പൈക് ഈ മത്സരരീതിക്കെതിരെ വിമർശനമുയർത്തിയിരുന്നു.